Laisse problem koze.....

Tan mo lavoi.....mo ene ladrog

Tan mo lavoi…….mo ene la drogue
Pas dire ou pa cone moi, mo fine la depi des millier danné. Pena ene payi ki pas cone moi, mo partout coumaniere ene virus. Lorla mo prend toute forme. Dimoune avale moi, fime moi, injecté moi et meme aspire moi par zot trou nené. Mo ossi tou coulere et tou kalite. Croire moi mo ene bon zafer, mo cone fer ou gagne nissa, plein tank.
Depen cot mo eté, ena place mo legal, ou capave servi moi dans ene function ou meme en solitude, mais preské partou la loi pé taye derrier moi. Zot deracine moi, bril moi, expose moi comme ene danger pou la societé. Mai ki oulé mo fer? Mo la trankil dans mo coin ziska ene latet feb decide pou gagne nisha are moi.
La plipart tan mo pe pousse kuma ene zoli plante et mo me mena variete ki larg zoli fler ki ti pu anbelir ene zardin . Ou pa pou croire si mo dire ou mo na palé lamerdma, mo envie reste trankil dans mo coin. Mo meme decouraze banla kan zotte servi moi. Premier foi mo fer zot toussé, tranglé, agir couma ene bourik, meme ziska perdi lesprit ….Mais ou croire sa fer zotte per? Ene de merde! Zot retourné.
Pa bizin dire ou mo amerdé, certain péfer grand fortune lor mo nom. Alor kan zot reservi moi mo fou zot plis lamerdema. Mo fini zot. Zot nepli cone ki nissa ki pa nissa. Ou get zot pitié. Mais moi mo fine fer pou fini zot. Zot amerde moi, moi mo amerde zot plis ancor. Mo tasse are zotte ziska la fin de zot zour. Kan mo dire mo fini zot , mo tini parole, moi. Lidée cest kan mo detrire banla, le reste pou apran ene leson et fou moi la paix. Ah ba……

Sa ki amerde moi encore plis sé tou sa ban kipé zouir zotte ti fortine acoz moi. Ou trouve ti dimoune pé vine gros palto, condire gros loto et pé amene la belle vie. Zot apé partage moi couma nier maspin aprè marriaz. Tou pe rode moi et lor la pé paye gros lamoné do!!! Ena croire zis dimoune ki dans problem ki rode moi, ale merde. Pena classe dimoune… So riss, so pove, travayer, somere, zenfan lecole, tou rode moi. Zotte bizin moi nimporte ki ler, gramatin, tanto, dan la case, anba pied lafourche, partou bon…… Kan lanvi la bez zot…..
Ou coné moi aussi mo fatigué et mo dire tot ou tard zot pou plein are moi…Koté! Zotte apé reinvinte moi…zot appel sa designer. Dire ou aster mo ena tou kalité nom. Lontan mo ti zis gandia ek lopium. Aster mo appele brown sugar, subutex, et tou kalité zoli nom. Mo preferé cé heroine….dire ou mo ene hero pou la masse!
Aster ou pou pensé ki tou kalité control ena lor moi. Gouvernma pé passe tou kalité laloi, tou kalite lekip pé formé pou touye moi, lisien aprend senti mo loder….depi satelit dan lespace pe servi pou rode moi. Mo mari wanted !! Lorla sa ki heberge moi zot ale lazol et tou zotte dibien sezi. Kiou pou pensé, avec tou sa zefort la mo lavie pou bizin bien courte! Ki sa imbecile ki pou riské tou sa ki ena zis pou heberge moi? Ki sanla pou envie mo control so lavie, detrire li ek so famille. Mé non, tou sa zefort ki banla pé met la moi, mo calvaire continuer. Mo touzour en gran demande.
Kan mo pense tou sa ban plan daction ki preské tou gouvernma dan le monde pé fer, expert pe coze gran gran cozé….cot sa fine amené. So la loi, so expert, so traitema, so counselling , tou dan beze. Difé mo fine alimé la palé teigne…… Ki oulé mo fer?
Pourtan sa ban couyon ki servi moi la zot pé bizin atak dimoun, kokin pou satisfer zot yen. Vol, viol tou apé ogmanté. Pe kokin bonbone gaz, vié feray…ziska ti lisien zot pa kité. Dimoun per pu mars lor simé, pa zis asoir, mé mem gran lizour. Sekirite dan le monde entié dan petrin. Ena mem pe touy mama, tantine pou sa boute lapoud la. Sa mem nou appel sivilization 21eme siek sa.

La mo pé pensé, ki si après tou sa temp la zotte pa pé capav fini moi, kitfois pou mo gagne la pé are zot mo bizin dire zot ki zot bizin fer. Mais mo cone zot latete, li couma otriche… li fine rente dans pik latrine, li pa pou envi sorti lor sa simé ki li fin pran la. Li pou continier avec so laloi, so lisien, so satelit et so bane lekip detecter……et sitou so mentalité ki li capav control moi. Ha ha !
Mé mo croire mo pé coumense ena lespoir. Aster SIDA apé cole are moi couma calecon are simiz. Sa apé coumense porte so fruit. Mais lerla aussi zote enkor timide avec zot bane action. Zot apé don drogere sering!!! Ha ha! ha! Sering…. Tou coné sa pa siffit, ine gagne ene 30ene danné pé servi sa sans aboutir oken part…Eski sa fin control moi ek SIDA….Rapplé bien SIDA ek moi nou ene lekip!
Bon mo pou don zot ene ti conseil avan mo alé. Blier tou sa ki zot pé fer pou control moi la, narien pas pou travail. Zot déjà con sa. Aster sa ki zot bizin fer sé pans otrema……kitsoz ki zot coné pou travail mais ki zot pena couraz pou fer. Lavie des million dimoune depande lor zot couraz….et sirtou moi mo depend boucou lor zot pou mo gagne ene repos bien merité!

posted by Ton Duc @ 4:16 AM