Laisse problem koze.....

Tan mo lavoi.......mo mem SIDA

Tan mo lavoi .......mo mem Virus SIDA
Mo pa bizin presente moi...Le monde entier conne moi, et mo meme pli popilere ki Michael Jackson. Mais sa ki drole, personne pas comprend moi. Poutant mo fine la dépi plis ki 30 ans, mo ene vie siko. Mo bane collegue virus pas dire sa longtemps la, Certain, chaque lanné li bizin change so couvertire pou li capave sirvive. Mo bane competitere virus, ena boucoup coumsa, pé attak poule, zoizo, mouton, bef et otre, moi mo occupe zis dimoune. Zot meme ran moi ene sevice paski sak foi ki zot paret, zot captive tou latention et dimoune blier moi.
Dimoune hayir moi, dotre per moi et la majorité merde are moi. Et poutant, tipti couma mo été mo apé fer ravage partout dans le monde. Mo pire ki Gensis Khan ek Atilla le Hun met ensam. Mo pire ki premier et dezieme guerre mondial mette ensam. Mo senti moi indestructible et meme zouir la vie eternelle….Mo ene ti bondié ou diable, prend moi couma ou lé.
Mo ene virus et mo telma tipti ki personne pa trouve moi, et poutant mo la pé promné parmis zot, san probleme. Pou moi mo ena passeport universel pas bizin visa narien. Mo dans pays riche, pauvre , dan ene ontinan ou bien dan ene ti lile. Mo pas guette figire, coulere, relizion, mo donne tou dimoune equal opportunity pou frekante moi. Dans mo café pena triaz.

Kan zot ti fek cone moi zot tou ti pe paniké, dire ou, meme certain pretre ti pe dire ki bondié ki fine avoye moi pou reduire decadense sociale. La race humaine dire ou fine decouvert la revolution sexuelle. Sex ti vine ene badinage. Pou boucoup, fidélité dans ene couple ine disparet et fer lamour avec zanfan in pran lamplere. Ena croire ki acoze sa meme bondié fine amerdé et fine avoye moi pou force dimoune prend le droit chemin.
En fait ti ena ene bon lepok fidelite ou mem abstention ti retourne en vogue. Mais sa pa ti pé fer moi plaisir. Com ene virus si mo pa propazé mo pou mort…disparet. Herezma pou moi, dimoune fine associe moi avec ban homosexuel. Coumenaniere mo contant zisse ban homo. Zoli la vie, dire ou, ala ki bane la pensé sa zisse pou homo alor zot pena pou casse latete are moi…Zot capav recoumense seme zot la grain partout couma avan……Mo guet zot mo rié. Ala ki moi aussi mo coumense seme mo lagrain partout et dans ene timama letemp mo zouene mo millionaire et la pa bizin dire ou comier million dimoune fine ouvert zot laporte pou acceuil moi a bras ouvert.
Mais bien vite zot ale decouvert ki mo pa zis ene probleme pu bane homo mais pou tout dimoune, zomme, fam, zanfan et tibaba. Bez lor moi zot pe fer grand zeffort pou detruir moi, boucoup casse pe depensé lor moi, zot ti croire mo Malaria moi capave contrôle moi…ha ha ha !!! Li bon zot seyé mais mo feblesse zot pa le prend compte. Dimoune so mémoire trop courte et li croire li mari tous, y compris moi. Ou conné, moi kitfoi parmi tou bane camarade virus, mo meme pli faible, mo ena ene grand defo mo paresse. Alor ki mo camarade inflienza ek malaria content voyagé, moi mo pa fer narien. Mo res en place… Mais selma mo ena bon manniere.. kan ene dimoune invite moi chez li, mo pa capave refiz so linvitation. Sirtou li apé acceuil moi avec otan de joie et douceur… ki oulé mo fer?
Mo bizin dire mo ti ena mo bane moment comik. Pareil couma zot ti associé moi avec bane homo, apres avec bane prostitué, aster zot trouve moi camarade are drogere. Pa bizin dire ou leffet ki sa fine ena… si li ene probleme prostitué ek drogere ala ki lezot aret per moi, sitou ban zenes, et mo carriere pran lamplere encore ene foi.

Pli mo rod prend la retraite, pli zot met moi à lepreve. Zot pé rende moi pli populaire dans mo vié zour. Mo lor television, dan salle de conference, dans laboratoire, lor bilborde, partout. Zot pe dire ki bane dimoune ki heberge moi zot ene hero. Zot prend moi pou ene saint..zot decret ene zour special pou moi dans le monde entier… zot allume labougie partout et zot meme fer minute ou meme heure de silence en reverence a moi. Zot fine donne moi ene simbol.. Jesus ena la croix, moi mo ena ti rozette rouge…pas mal hein !! Dans ene coté zot apé distribué capot ek seringue couma dire sa meme solision, ha ha !! Zot encore couyon… guet bane zenes kipé fer avec kapot…narien ! Zot dire ou pena nisha are sa.
Bon mo fine coumense fatigué et mo anvie al reposé inpé. Parfoi mo zalou linflenza, li couma camaleon… li change so coulere souvent et sitout li gagne so repo. Moi mo pli faible parmi tou sa bane virus la mais malerezma zot na pas lé largue moi. Ou choké kan mo pé dire ou ki mo pli faible ki mo copin linflienza ? Li vrai mais mo coné ou pas croire moi. Couma ene ti comeraz couma moi ki tou le jour enba microscope et pé bombardé avec cocktail medicama et lor la mo papé zette lebras ? Couma mo capave dire ki mo faible ?
Ou coné mo pé envi comet suicide. Mo pé raconte ou mo lavie pou ou capave aide moi. Mo pé dire ou mo faiblesse. Si ou envie contrôle moi pa guette zis dans laboratoire. Mo la mort trouve dans mo zistoire. Mais mo fine frekante ou pandan 30 ans et mo coné ou pou lire mo zistoire et mo capave predire ou reaction…..Ayo… Mo pou la pou ene lot 30 ans !

posted by Ton Duc @ 4:19 AM