Tan mo lavoi...mo ene tiyo desapma
Laisse mo introdire moi, mo partou dans le monde et tou dimoune bizin moi pou zot voyagé. Sans moi ou ti pou encore pé voyage lor saret bef ou calesse souval. Forcé forcé ou ti ava servi ene biciclet. Ou trouve moi lor motociclet, loto, bus, van, tracter, avion et meme fizé ki ale dans lespace…Comme ene tiyo desapma mo bien itil. Sans moi oken moter pas travaye.Mo tellema popilere alor ou pou pensé mo bien héré, mo en vedet et zotte pou prend moi bien konte. Koté !! Zotte maltret moi plis ki ene dernier lichien. Ban zenes defons moi pou mo fer plis tapaz et sa amerde boucou dimune. Acoz detroi latete brilé, mo fine responsable pollition sonor. Lezotte pas kontent trouv moi prop. Zot pas nettoye zot moter et alor sa fer moi largue ene lafimé noir. Et mo dire ou ban proprieter ki possed moi la ou ti pou kroir ki zot envi mo ena ene longue lavie, mais ene de merde !
Sa lafimé la li pa bon pou moi et mo koné li pa bon pou ban himain, zanimo ek plantation; mo touzour la pé pet lor dimoune. Mo ti pé gagne kuraz letan guvernma pass laloi pou control mo lafimé. La mo dir top top paski aster zot pu nettoye moi. Gouvernma ine dire ki vehikil pu ale lor repo si pas nettoy moi – pou bizin real fer fitness et pay laman. Pu aret voitir lor simé et ban exper mette ene massine dan mo tru derrier pu geté ki lafimé mo largé….Koté mo encore tuzur dans mem bato.
Si docter fer letopsi lor zot
pou truv zot poumon couma vié marmit
Guet ou miraye divan la porte, ou rido, a linterieur ou loto lor parbriz, lor ou figir, mo fin pet lor tou. Cot ou trouve moi plis ce acot ena robo ek bosse lor simé. Mo sagrin ban dimun ki reste pre avec sa de place la, zot lacaz ine bizin perdi boku valere acoz mo lafimé. Sa san mo coz la santé dimun ki reste dans sa ban lacaz la. Ban dimun ki reste dans lacaz lapaye, massoné avec caca vas ti senti pli bon ki sa ban dimun la. Si docter fer letopsi lor zot, pou truv zotte pumon couma vié marmit. Lontan pas ti mal, ti ena tigit vehikil et zimoune ti ena bordire bamboo. Sa ti pe filtré mo la fimé et lacaz ti reste propre. Aster dimun in tire bamboo pou met miraye – catastrof.
Ou fine tan dir diarré… moi kan mo largue mo lafimé ou a kroir ki ene lelefan fine gagne diarré, tellema li buku.Tu le zur mo lor larout et mo truve bane gard pé dibuté. Sirtu la police ki lor motocyclet. Sa ban la corias sa. Pa capav anbet zot. Zot fine gagne consign avec minis pou aret tu vehikil kipa nettoye moi. Mé la aussi bez. Et moi mo mechansté. Mo fer ene mannier mo pet lor zot ossi, kumsa zot ava pran moi conte…..ou kon la suite ! Hé, pa pensé ki vehikil gouvernma li pli bon, zot aussi pareil.
met mask dan lacaz
Kan mo pé tan dir ki zot apé aret dimun ki fimé en piblik, mo kas ene gran rié…ene rié futan. Si sa ti komeraz lafimé sigaret la pu touy dimun ….abé moi ki mo pé largé? Zenfan pé ale lecole pé respire moi plein tank. Motocyclist kipé suive moi pli bez encore. Fruit lor pied ek legume, mo pet lor zot ossi a tel point zotte nepli gagne gout couma lontan. Mo sagrin ban dimun ki asmatic. Mo conseye zotte met ene mask kan ale lor laroute. Kitfoi aster ou bizin met mask dan lacaz ossi. En parlan de sa..ou ena choix – soit ou ferme ou lafnet ek mor de saler, ou bien ouver ou lafnet et pollué ou mem – mari choix sa !
Lot zour la mo ti bien content. Ene motocyclet electric ti pé suive moi et san tapaz ni lafimé. Top top sa ! Aster mo pé trouve ene lizour. Mo trouve ki bientot zot pou donne moi mo repo. Selma mo con dimune couma été. Zot pou van bon kitsoz trop cher et alor moi mo pou ancore lor larout…A moin ki gouvernma donne sibsid lor vehikil electric , parey couma lor gaz ek la farine. Pli bon encore, pas paye declaration ou oken duty. Kot ena ene boute gratis pu gagne, dimune pou sot lorla – met promotion.
Aster mo pé trouve ene lespoir pou nou lenvironma. Pollition baissé, la santé dimoune meyer, tou kitsoz reste prop et ....sirtu mo disparet.
posted by Ton Duc @ 4:24 AM
0 Comments:
Post a Comment
Subscribe to Post Comments [Atom]
<< Home