Laisse problem koze.....

Tan mo lavoi.....mo ene gato deluil

Tan mo lavoi .....mo ene gato deluile
Mo pas bizin dire li sa, pou bon mo bien bon. Mo ran boucou dimoune servis sirtu zanfan lekol, travayer, et sa ki zoli ou gagne moi gramatin ziska tanto. Mo mem etoné kan dimoun pé ale travaye gramatin, zot fini pran zot ti dezené lakaz et kuma zot desan dan bis zot bord are mo marsan. Kuma ou Koné mo vine dan tou zar…dal puri, gato pima, brinzelle, baja, dipin frir et sitou so satini ek zassar pima…ah san blié cari grospoi ek rougaye. Dir ou pom damur ser passer, marsan touzur ena zot.
Mo divan tou lekol. Dan lekol pa gagne droit boire gazez akoz diabet ek sirpoi…dehor gropoi pé attan ! Kioulé mo fer ? Kan zanfan la pé bordé, mo larg en bon parfin ki fer zot vente grogné. La, mem si zot fin amen bon dipin ek bon manzé ladan, parfin mo largé la pa kapav rezisté. La vante plein plein, arive tanto trisik vid. Forcé inpé kari resté. Mo koné mo zur divan lekol pé konté paski si ene zur zot ouver en lakantine ki van bon manzé a linterier lakur, mo pu disparet kot lekol. Sa li diman mari kuraz pu lotorité fer sa !!!
Mo place preferé se akot lagar Rose-Hill. La mo raporte gro gro. La foule pena ler la minit pa rod moi. Mo ene vré leroi lor la gar. Dir moi ene dimoun kipa oulé moi. Dire ou ban marchan fer moi dan tou zar. Mem mo varieté ki bien rar..gato aroui. Dire ou pa gagne letan fré fini vandé. Pourtan kot mo été? Mo lor ene koin parking kot ou pa mem trouve koltar, nek ene kush deluil ki ou trouvé. Sa in vine ene makatia….sory mam makatia, mo pa le maltret toi, ene vié expression sa. Dire ou li noir kumanier karay ki kui moi la.
Ou kroir sa fini la ? Imazin komié bis diezel demare lor sa lagar la ! Lor la ena so taxi, tuzur diezel ek so lafimé noir la. Lorla ena tou sa loto, van privé ki vine dan parking la…mo famiye, ene bel karnaval lor lagar. Lorla ena mo marsan so lafimé ek lavaper deluil. Sa amerde moi inpé paski si pa ti ena kopin siaw, moi ossi mo ti pu santi diezel.

Ou kroir mo pé pleigné, atan sa boute la. Tou sa ki mon dire la panarien sa, comparer avek parfum latrine. Mo telma pré are latrine ki pa bizin labriz pou loder la vine are moi – get ki direction divan baté ! Mous pa bizin bat so lezel li fini arive lor moi. Marsan couver vitrin kuma zot anvi, mous la ine plein are kaka titour aster li rod moi com desser. Lorla mo pé get zot pon zot dizef lor mo kamarad, parfoi lor moi ossi…Kioulé mo fer? Selma rezma ena toilet la sinon kot mo marsan ti pou ale fer so bezoin. La ba rezma ena delo pou li lave so lamé, malgre ki pena savonet.
Sa nou kapav dire pa pou kapav sanzé sa. Sa ban marsan la apé rode zot lavi et kroire moi ena zoli kas ladan. Selma fodé kon debrouyé. Si ou pou ekut inspecter saniter, bizin respecté la loi, met legan, met overall, ti sapo tousa, abé la kestion sé, ki fer pé van moi dan sa plas la ?
Mo repitation pé gagne baté. Aster exper pé blam moi. Zot dire mo pé fer dimoune gagne diabet, mo pe fer zot vine gro boudouf, zot leker pé karoté. Ki oulé mo fer? Rezma zot papé blam moi pou lepidemi gastro. Rezma zot avoy sa lor mo coleg poulé. Mo kroir zot trouve moi tellema da ban place dan pince ki exper pansé dimoune ine devlope iminité conte gastro kan zot manze moi – mo bien kroir li vrésa. Oune deza tan dire dimoune gagne diarré kan zot manze moi ? Malgré so polition diezel, so la pussiere, so loder latrine, so mous, hygiene mo marsan, so transpiration, so terné , so toussé, so gropoi hier, ou pou tuzur truve dimune pé met laké pu manze moi.........Bon Apetit!!!!

posted by Ton Duc @ 4:26 AM