Laisse problem koze.....

Aster zot nepli apel moi couvan. Zot fine pas laloi pou control moi, alor aster mo appel ‘Home’. Ena dimoune apel moi mézon de retrét, mézon de repo, Ashram, Foyer et tan dotre. Mais aster mo nom legal li ‘Home’ et mo contan kan dimoune apel moi par sa nom la. Li done limpresion ki kan ou vine kot moi ou pou pareil kuma ché ou.
Mo fin la depi bien lontan….plis ki 150 ans !!! Avan mo role ti bien diferan. Persone pa ti lé kon moi, ni piblik, ni gouvernma. Zis ban association reliziez ki fin coumens moi et lerla ti pé ran la société ene mari service par don heberzma pou ban dimoune demuni et ene place pou ban dimoune vine fini zot vié zour. Mais pa zis vié dimoune ki ti pé vine cot moi – ti pé pran tou dimoune, so zom, fam, zanfan, mem tibaba. Tou sa ki ti bizin siport ti gagne ene plas.
Dire ou lavi pa ti facile. Manzé pa garanti – pé fié lor donation pou lanplasma, manzé et labilema. Si ou gagn dipin gramatin, ou pa garanti pu gagne diné. Me ban relizié ki ti pe occup moi la ti extraordiner . Zot ti bien debriyar et fine don ban residen la, boucou lamour. Dimoune couvan ti met ene long robe – in gagne ene balo la toile avec ene donater et habile tou dimoune pareil. Pa ti ena soi. Mo sagrin letan mo get sa ban dimoune la,mais kioulé mo fer ?

Ti arive ene lepok kot la société fine realiz so responsabilité et gouvernma in pas laloi pou don subsid ban institition saritab couma moi – alor tou coumens amélioré. Li pa ti ene gran lamonai mé omoin sa fine aporte ene soulazma. La mo coumans amélioré. O moins aster residan coumans gagne inpé plis manzé. Ban dimoune coumans fer donation manzé et mo stock manzé dan store ogmanté. Ena plas mo bien bon, zot fine organiz moi tré bien et mo pé don ene service inpekab, malgré limitation larzan. Mai ena plas mo dan bez terib. Ena dimoune so lacaz lisien pli bon ki moi.
Aster pa coné ki fine arivé, mo coumans paret inpé partou dans payi. Ena preske ene santene de moi partout. Ena plas mo tipti, zis pou 6 dimoune, ena place mo mari gran, ziska 150 dimoune mo capav tini. Mo offér dortoire , ziska 25 dimoune dormi dan ene lasam. Sa ti en mari lidé sa dortoire la, paski kan ena pou trouve place pou ene nuvo dimoune, ou nek ena pou avance 2 lili et fonce en lili dan lespace la. Salon ti bien souvan ene lavarang ouver et dan liver mo pa capav protez ban dimoune la alor zot pas zot letan dan dortoire.

zozo azout yogurt dans lasiet manzé

Salle a manzé ti inpé ene problem paski zotte fine sanz moi en dortoire pou don plas plis dimoune pou resté. La rezma dan mo lacour ena pié fruit alor dimoune ale assiz anba pié pou manzé. Mai so problem sé kan ena lapli. Touffé brede vine bouyon bred avec dilo lapli. Parfoi zozo azout yogurt dans lasiet manzé . Plis ki nou pé coz lor manzé, ena plas residan bizin manze saki dimoune amen com donation. Mo tan residan pe dire : ‘ viré tourné briyani, mo fin plin debordé ar briyani’. Ena plas ou capav conte comié gro poi ena lor lasiet. Ena dimoune gagne 2, 3, ena gagne zis bouyon. Ena place ou gagne zis manzé vezetaryen si ou pa vegetaryen, ou dan bez, ziska ou mor ou pa pou goute ene bon ladob lavian. Ki mo pé dire boucou plas pa gagne lavian, ou gagne plito soya !!! Kan mo pans tou sa ban dimoune ki fer donation manzé la kitfoi li ti pou meyer si zot ti geté ki mankma ena dan plas la et done sa plito ki manzé. Ene fotey li pli importan ki donation manzé. Fotey la pou la pou lontan.
Sal de bain sa ene lot catastrof ancor. Loder la epuvantab. Kioulé mo fer ? Pa moi ki fine dire mo bizin ena zis en blok toilet pou 20 dimoune. Pas moi ki fine dire laport toilet ek sal de bain pa importan. Pa moi ki ti dire aligne ban dimoune et pran ene lans arose zot pou economiz dilo ek letan.
Dimoune ki ti pé travaye kot moi la, ena ti tres bon et zot met lamour dans zot travay, ena la li pa pensé ki ene zour so tour pou capav arrivé cot li osi bizin vin res cot moi. Mo pa blam banla trop. Person pa fine gagne formation alor zot vine travay cot moi couma ene servante, pas couma ene aide soyan. Zot pa realizé ki ban dimoune ki reste kot moi la zot pou bizin vive la ziska la mor – et pouene paké, sa mem pé atan !!! Prié kan bondié pran zot. Com ene couvan mo sagrin zot, mé ki mo capav fer ?

vié dimoune handicapé dormi lor lili letaz

Ah mone blié. Pa pensé ki si zamé ou pena control et ou tranpe ou lili, ki dimoune pou compran ou ! Ale merde. Kot moi mo trouve dimoune pé dormi san matla. Matla fin metsec dehor mé lapli ine pli tranpe li, avek consekans ki ou coné. Ena lot place si ou tramp lili zot met ou dehor – zot rode zis dimoune ki facil pou okipé. Lorla si ou ena maler ki ou latet na pa bon, abé la ou dan pins, soi ou res mantal ou ou traine lari.
Sa mo famiye li zis ene ti apersi couma mo ti été avan. Herezma en 2005 fine implemante ene laloi ki obliz proprieter enrezistré moi et sirtou ena reglema lor couma mo bizin été, ki fasilité mo bizin offer, et couma bizin administré moi. Aster bez lor ban braconier ki ti pé fer ene fortine avec moi. Difé lor ban ki ti pé fer vié dimoune handicapé dormi lor lili letaz, partaz 1 poule a 25 dimoune et aster pé dire zot bizin met staf lanuit, lizour !!! Lorla pou ena inspekter ki capav visit moi nimport kiler pou get mo standard et siport ki ban rezidan pé gagné….. Mo bien contan letan mo tan ki sa laloi la fin passé. Aster mo capav respire bon loder, mo capav trove impé sourire cot moi.
Mo dire ou ene volé deboulema apré ki sa laloi la fine passé. Mo dire ou ban la coumans paintir moi, converti ban dortoire, debaras lili letaz, et dire ou inspecter pe fer letour, don conseye et get si tou corek. Aster nouvo dimoune apé interes pou monte moi et zot apé constrir moi bien dapré ban norme etabli. Dire ou aster mo zoli garson. Ena plas mo meme 5 etoile.
Mé 5 etoile ou pa, sé moi kicone soufrans ban dimoune ki reste kot moi. Kiso dimoune ris, povre et autre, zamé dan zot lavie zot ti croir ki zot pou vine reste cot moi. Ena ti bien posedé, mé sirconstans été ki zot fine bizin mo laporte. Et kroire moi, ena place mo ancore dan bez…dortoire touzour la. Moi mo conseye tou dimoune ale ran ene visit cot moi dan couvan et get bien couma mo été………….. paski mo prochain clien sé ou.