Laisse problem koze.....

piess teatre

Nuvo Lespwar
Akter
Gaston – dan so sinkanten
Barman ( Jessen) – dan so tranten
Zen kup -
Permal – dan le sinkanten, abiye bien sik

Act 1 Scene 1
Lendrwa – dan en bar
Barman deryer kontwar et pé ranz ban boutey, Gaston asizé a tab avek en
labiere et pé fim ene sigaret. Ene zen kup lor en lot latab
Permal rentré, lev la mé, salyé Gaston et al lor bar pu en labier, et pwi vin zouen Gaston.

Permal (ser la mé Gaston, ris ene sez asizé.)
Ki manyer ta, inpé lontan pa zwen.

Gaston
Wé, sa fer en nonbut letan, matlo

Permal
To fam anpes twa sorti aster ??? To nepli mem vin zwé boca – comié tan sa fer……..En 6 mwa par la ?

Gaston
Non matlo, fem korek, mé pozition pa korek. Aster mo prefer vin tap en labier dan en samdi, apré si ena en mat futbal lor televizion kas en poz are sa. Aster lavi gaspiyaz lor boka, lekurs, la bwason tusala fini, matlo. Sel vis resté, se zis sa sigaret la.

Permal
Pas koz tro vit taler sa osi to pa pu kapav fer – fini lepok fimé kan to envi. Li. Biento pu ilegal pu fim mem dan to drainaz.(permal alim ene cigaret et ris longma lor la)Bez sa, kan mo pens sa vis la osi pa pu ena. Pa fasil ar sa payi la. Mo krwar mo bizin al rest Agalega. La ba mo tan dir tu kisoz gratis.

Gaston
Krwar sa twa – kan guvernma desidé, pena plas ki meyer kiso camouad. Partu mem bez.

Permal
Mo tan dir ki pa lontan bwar en piblik osi pu areté. Lor laplaz to pa pu capav ni fimé ni bwar….. Kitfwa acoz dezord lor la plaz manzé osi topa pu
capav amemé. Parey cuma lontan lor lil o serf.

Gaston Non ta sa pa pu capav areté. Sa li form parti nu tradition, amizé en dimans lor laplaz , plonz en de ku, tap en ti grog, en ti dialog ek met en nisa.
Permal
Pa tracas twa …….lerla to pu truv tu dimun ar sopin sprite.

Gaston
Ki fer akoz pa kapav bwar lalcol.

Permal
Non do, buteil sprite li vert person pa koné ki ena ladan.(Permal riye)

Gaston
Pa dir sa taler sprite osi pas pu gagn drwa bwar. Parey cuma dan lekol, acoz diabet.

Permal
Mo tan dir biento pu fuy sak lecol, pu gueté ki zenfan in met dan zot dipin
panga ena manzé dilvil.

Gaston
Wé, si zenfan la ena dipin!!! Mo dir twa aster lavi in bien sanzé -
To pa gagn drwa bwar akoz nwizans
Pa gagn drwa fimé akoz cancer
Pa gagn drwa manz gra akoz sirpwa - sa en nuvo zafer sa!!!
Pa gagn drwa fer lamur akoz sida…………………
Mwa mo blam Dr ek sa program diabet 7 lor 7……….
Lot zur la mo truv mo fam pe mizir so la taye avek sentimet, mo ti crwar li pe fer en zip, li dir mwa non…. program la dire li tiek so BMI. Pa facil sa!!!

Permal
Wi me eksper la ena rezon to bizin get to lasanté et osi pans la santé lezot. Si mo fimé mo pa capav osi fors mo fam zenfan fim mo sigaret.To fam ena rezon li pé pens so lasanté. Sirtu li ena en tipwa ar li.

Gaston
Wé…. eksper la dir twa fer tu sala - dakor!!!! Mo pu konpran si li dir mwa osi ki li pu -
premierma, met trotwar partu pu sekirité ban pieton lor larut
Deziema, tir tu ban bos lor simé pu redwir duler ledo - to fin truv ki
vites bis pas lor bos???
Trwaziema, aret tu transpor ki larg lafimé acoz lasm, kanser et loder -
parfwa to pa truv divan twa telma lafimé la nwar - pa dir mwa sa
li bon et lafimé mo sigaret ki pabon.

Permal
(interompe Gaston)Eta to pe koz nimpot la…

Gaston
Les mo fini…..
Katriema, anpes vol, viol, sodomi, krim, lisien eran ki mord dimun
et kaka partu.
Sinkiema, detrwir tu lera, kankrela acoz maladi
Ek finalma, en fwa pu tut, kontrol la drog ki koz plis domaz ki mo sigaret.

Permal
La to pé rod tro, ena laloi kont tu sa ki to pe dir la.

Gaston
Wé mé lafimé pe don bal lor la rut, et enkor pli bez si ena en bos lor simé divan to lacaz - guet ki kuler to miray ete. Pa pens pu uver lafnet, to gagn loder ek lafimé dan lacaz - sa raplé mwa lepok ti pé kwi manzé lor dibwa
Twa to pa voyaz par bis, sinon twa osi to ti pu gagn duler ledo - bis pa get bos ou tru... li fons dan tu.

Permal
Sa li lafot sofer

Gaston
béki to pu dir lor infestation lera, aster lera mem dan lopital, pu twa plas na pena, puli rezervé, et li rentré sorti kot li ulé et kan sa fer li plezir - sa li bon pu la santé !!!! Sa zo pa amen eksper anglé pu kontrolé sa!

Permal
sa pa pu kapav fini zot sa

Gaston
abé la drog sa li bon sa ????

Permal
Ki to lé dir ….. ena laloi kont sa, ena mem nuvo tretma pu droger

Gaston
Permal, twa to en dimun ediké, wé, dir mwa en zafer, depi kan la
drog en problem?

Permal
Depi tu le tan…..avan mem kreation listwar….. Romin, Grek, Sinwa, Indien...enfin tu ras depi tu le tan…Sa pa en zafer zordi zur sa.

Gaston
Wé… li pa en problem zordi zur… es ki li afekté zis dimun mizer, ti klas, somer….enfin eski li soizir twa ou twa to swazir li?

Permal
Non ta ….la drog pa get ras, kiltir, blan, nwar, ruz, ver, ris, pov, la vil, vilaz, enfin li pa fer diskrimination.

Gaston
sa vé dir tu gagn bez ar li…..Aster twa to koné ki problem et sufrans sa cozé…..pas zis pu droger la mé osi pu so famye….enfin pu tu dimun dan la sosieté.

Permal
Wi, droger la so lavi in fini…..so lavie personel, so lavie familial, so
travay, so la santé, ….an som lin fini, et li osi fini le zot. Fam, zenfan abandoner et lor la san travay, normal li pas pu ena kas .. et kan li pena kas, la li vin nu problem.

Gaston
Wé, aster li kokin sofamye, so voizin, so kamarad apres lerla li kokin kot li kapav. Dan so kafé pena triyaz. Vié feray, bobon gaz, portab, nimport kwa pu li gayn so fix.

Permal
(sinyal barman pu 2 lot labier)
mé sa nu bizin apran viv ar sa, pa pu ena sanzma.

Gaston
Pa kwar sa twa, sitiation pu vin pir a mesir ki kantité droger ogmenté.
Permal dir mwa en zafer - kantité droger pé ogmenté omié besé?

Permal
to mem fin dir li ogmenté. Zamé kantité droger fin besé ki a Moris u ayer.

Gaston
(lev so lamé pu exprim inpwisans)
Ziska ler ki fin fer pu control sa problem la??

Permal
Ena la lwa, sant dezintoxikation, nuvo tretma ar metadon, lorla dan ban payi developé ena tu kalité program pu kontrol la drog. Apre to kone ena ONG spesialis lor la. Ena osi expert ki vin moris.

Gaston
Wé, toi ek to eksper...mo fin fer inpé resers lor la, mo truv ki ena payi kuma lamerik, zot atak li lor plizir baz - la lwa sever, ena ban inité spesyal parey
kuma LADSU, zotmem servi satelit pu kon kot plantasion herwin eté.
En plis, kuma to dir, ena sant lor sant pu tret banla. Ek depi bien
lontan sa pé derulé ….. Mé ki resilta….. Dan bez.

(pandan sa letan la2 zenes la paret bien interesé ar Konversation
ki pé derulé la et zot pe get dan direkyon Gaston depi inpe letan)

Gaston
Ban zenes, ki zot pansé lor la, sa li konsern zot zeneratyon, sa.

Zenes
Ton, pa fasil sa, on diré ou ena kitsoz kont Bik Man la. Kontinyer man !!

Gaston
wé to kapav dir sa, et osi avek guvernma avan li, et tou ban ki ti la avan, insi ki Zorz Bus, Winston Tirtil et mem bien avan.

Zenes
Kul man, ou pé ris mo lakord la !!

Gaston
Servi lespri garson, pa nek aksepté tu sa ki gran misié dir. Tu payi ziska ler ki zot fin fer kont repansion la drog ?? Alé dir mwa!

Zenes
Aster man, li kul, marsandiz kalite, varyete, super, prodiksyon lokal .

Gaston
Pa kas latet mo pu dir twa - vwala sa ki li fin fer
1. Met la lwa, sa pa marsé, li met en lot lalwa
2. Li dir ONG fer travay ki li palé fer - dir ou ONG uver sant inpé
partu, gagn dokter pu don en lot kalité ladrog , don consey…
3. Li fer gran diskur, organiz seminar international, ekut dimun depi
dehor, gran exper.
4. Fer ene plan strategik pu dizan
5. pren inpé desizion ki sipozé pu sanz u lavi
Ki rezilta??????? ( en long pose)
Mo pu dir twa ki rezilta - li mem zafer ki avan mé olié problem resud,
li ogmanté !!!!
1. Furniser la drog rul lor gune
2. ti furniser pé tap kot
3. furniser lor lari li osi pé rule gro loto….purtan li somer
4. Ti zenes kuma twa nek seyé epui zwen tasé
5. Kan ti zenes in dan bez ki li fer, kokin pu nuri so vis, ala sa ki li fer.
Antretan nu nek viv dan frayer ...et la drog, SIDA, tiberkilose et tu sa kontign ogmenté. Mo tan dir nu kas rekor lafrik ou le mond lor ka la drog,
biento li pu parey pu SIDA.
Tu mezir ki fin pran in fel ….pu saken ki kit ladrog, en santain kumensé !!
Lorla tu kalité ladrog pé paret, pas zis gandia ek herwin. Aster to
gagn dezayner - wé twa krwar labyma dezayner.

Permal
pa koné ki mus fin pik twa - to paret in bien sanzé depi dernier fwa mo
fin zouen twa.

Zenes
Kul man. Burzoi la ena rezon. Get sigaret. Pandan 100 an, Bik Man dire u fimé - Bik Man pran tax et dir u vandé plin plin. Dir u Bik Man dir paye
patant feye la. Aster ene ku akoz anglé banir sigaret dan plas piblik, li osi
fer parey. En ku li truv sa pa bon. Alo si anglé manz kaka, nu osi fer parey?
Pu droger kuma mwa li met sant dezintoxik - pu fimer naryen ditu
Aster al ramas u bez - sa pa konsern li.

Permal
Mé sa li en bon fason dekuraz dimun fimé. La momem mo pé pens areté.

Zenes
Reflesi inpé lor la - ki fer dimun truv sa difisil pu aret fimé - san kwa tu dimun ti pu areté.
Mo ti pé lir en lartik lor sigaret. Li dir u ki konpayé sigaret met kitsoz ar taba la pu fer dimun gagn nisa, sirtu lamoniak. Sa u zuen tasé ar li. Si guvernma ti force kompayé pu fer sigaret ki diferan nu ti pu capav fimé trankil - sa li nu swa !!

Gaston
To palé mo sanzé, kan droger vin kokin mo bobon gaz, mo fuzer, depi
mo ti lisien zot kokin - kito lé mo pa sanzé? Aster pli bez, droger osi gagn SIDA, et aster zot menas twa ar sering. Ki zot lé, mo pa amerdé ???
Si zot lé zis pran ladrog, detrir zot la vi sa mo bien merd, mé kan zot rod detrir mo lavi avec lavi mo famye, la mo amerdé.

Zenes
Mé ton, tu payi aster pe don droger sering gratis, amen ou vié zot don
ou ene nef. Get zordi mo fek gagn dé nef. La mo pena pu partaz sering.

Permal
Moris si, pa kit lezot pay de lwin, sa ki lé, sering gagné gratis pu anpes SIDA Zot le rant dan sant , ena pu zom et osi pu fam ek zanfan Oulé tretma, ou gagn metadon. Ki oulé plis ki sa.

Gaston
Wé kan droger bat twa ek kokin to bag, lasen, pik twa ar sering tusala, lerla
mo ava ekut to langaz. To mem pe dir ziska zanfan invin droger.

Zenes
Mé ton, tu droger pa parey. Ou pa capav akiz nu tu akoz detrwa latet brilé.

Gaston
La to enkor korek, to swa lekol ou to pé travay ou to famy don twa kas -
ki to pufer kan to pena kas et yen la bez twa, to kumens gagn duler lestoma, to pé turn en ron, la bav pe kule, ki to fer lerla - twa osi pu fer parey cuma ban ki to dir latet brilé la.

Permal
To kone fasil kritike. Parfwa to bizin les eksper fer so travay. A mwoin ki to
ena en solition.

Zenes
Sa li vré, ou pa kapav kritiké, bizin met latet ansam pu truv en solision, sinon 10 an pli tar nu pu ankor kozé - letan sa mwa osi mo pu dan bez.

Gaston
To koné kan to pu truv solision, se kan nu aret fer nu ipokrit et nu fer fas a la vré verité - ki nu aret kuyon numem. Twa ti zenes ki to tia kontan truv arivé? Reflesi et to pu truv repons la, Li o kler, li la divan twa, mé to bizin
onet et mem si solision la paret li mem en problem, pafer nayen, omwin to
fin rod vré solition la.
Bon mo kit zot, bizin al zouen bolfam dan sipermarsé. Nu kontign
konversation la en lot zur.

Gaston don la mé zot tu et rode sorti

Zenes
Atan ton, sa kalité dialog la pa tandé suvan sa - rakont inpé kuma pu resud sa.

Gaston
ta ler mo get bolfam ki dir, si pena plan mo ava vin tap en lot labier.
Gaston sorti et rido besé

Act 1 Scene 2

Landrwa
Salon dan lacaz Gaston
Gaston pé asize lor sofa, pé lire lagazet.
So fam(Aline) pe asiz lor lot sofa pé get television

Gaston
Gaté met sa lor 3 geté si futbal la in kumansé.

Aline
sa fer 10 ku to pe dir mwa tieké et li tuzur parey…li pa paret ki pu ena zordi.
Gaston
sa amerdan sa. Zordi Man U pe zué et mwa mo bizin get kosonri.

Aline
Ki fer to pa al get li kot Permal, li ena Kanal, lerla mwa osi mo ava gagn la pé. Mo pa fin resi swiv sa fim la akoz twa. Ti dir twa met Kanal, la to ti pu kapav asizé trankil get to futball. Sirtu pé don twa 3 mwa gratis.

Gaston
Wé… apre 3 mwa ki arrivé……avek pri ki pe pran lasanser, twa to rod azut
depans.

Aline
Abé fer kumsa mem, naryen to pa pu ena… apré to pu nek pleiyé mem.

Gaston
To pé dir mo pleiyé…..mé zordi dan bar mo fin zuen Permal ek 2 ti zenes.
Zot pa truv mwa pleiyar …..okontrer zot pé apresyer kitsoz mo dir.

Aline
Ki to fin rakont zot kumsa….. Twa tu letan to ena en zistwar pleiyar…

Gaston
Non do ta… to raplé kuma mo ti pé eksplik twa kuma kapav resud ban
problem sosieté?....Twa to ti apel sa lidé fu, person pa pu ekute twa to ti pé dir. Lot zur la moti pe lir lor internet ki Komiser lapolis dan payi de gal pé dir preské mem zafer ki mo pé dir pandan en dizen dané. Mé li li pa osé al osi lwin ki mo pé dir.

Aline
wé twa to pli mari… to kon plis ki mem sa komiser la

Gaston
Wé mé li li pa kapav al osi lwin ki mwa. To koné komié dimun panse ki sa ki mo dir la li vre - ki so dokter, avoka, la polis …tu panse li en gran lidé.

Aline
Abé apart rakont to lidé, kot sa pe amen twa. La drog tuzur en problem,
sékirité dan pins..lot zur lamem tantine savit pé dir ki 2 zom fin ras so tali -
pena mem respé pu simbol mariaz - si sa kontinyé mo pa koné mwa

Gaston
sa mem mo pé dir…nu bizin et onet, realiz ki problem nu pé bizin fer fas, pa zis dan moris me osi dan tu lezot payi. Get ki fin ariv SIDA. Tu dimun dir sa ene zistwar ban homo ki gagn sa…apre ki al truve..ban droger ki pe fan sa plis are zot sering. Tank li ti zis ene zistwar homo, li pa ti en gran problem… lerla pa mem tan exper…aster la kan de dizen milyer pe gagn li, abe li deza tro tar. Aster imazin nu res lé bra kroisé… ki pu arivé ??????

Aline
Ki fer to pa racont to lidé ar lagazet, lerla tu dimun koné kuma solisyon la simp, o kontrer, guvernma pu ekonomiz kas ki zot kapav depans lor tretma… To koné, koko, tu lé tan mo dir twa toena en paké bon lidé me to nek blagé to pa fer naryen avek li. Sa fer o mwoin 10 an to pé pens lo la me ki to fin fer ziska ler…..naryen….. Nek kozé mem

Gaston
Gaté… to koné ki bez si dimé mo ale lor lagazet mo rakont sa plan la???
Ban baron ladrog tuye mwa, kidnap twa et mem nu zanfan pa pu sapé ar zot. Paski sa lide la met tu sa ban furniser la drog la lor lapaye. Tu sa milion ki zot gagné aster lor ledo et sufrans tu dimune - aster la mo dir zot pran retret san lumsum ni pansion??? To krwar zot pu vin shek hand ar mwa et dir merci burzwa?

Aline
alor acoz sa to pa fin fer narien? Sa to exkiz sa……

Gaston
Mo ti pe pansé én sa ban eksper la ti pu vin ar sa lide la….mo fin mem coz sa en fwa avek en gran eksper…li dir mwa bohom, pu dir sa en publik li parey kumadir ou fin met ou latet lor biyo… kumsa kri kri li dir mwa….. Alor mo bizin pans to sekirité ek osi ban zenfan

Aline
Wé mo kompran twa me mo krwar narive ler aster pu fer kitsoz……. Nek
bizin truvé kuma pu repand la nuvel….. Ki fer to pa ekrir couma dire en
roman…tut facon to kontan ekrir

Gaston
la osi sekirité vin en problem …sa fode guvernma don en kudme lerla to ena en sans. Apart guvernma person pa kapav fer naryen, eksepte met presyon.

Aline
Abé kifer to pa al;e coz sa ar minis sekirité sosyal - lot zur la mem mo tan li
pé dir ki bizin ed ban droger……

Gaston
Mo les sa pu en lot zur

Aline
Bon la nu enkor pé vir en ron… les nu pran desizion pu al de lavan lerla nu a getté kuma fer li. La mo konsey twa pa tro koz lor la panga banla désan twa avan mem ki to al kitpar. Alé al get to futbal kot Permal u mem al danbar zot éna kanal laba.

Gaston
Wé mo krwar mo kas tradition mo al dan bar enkor en ku.

(Gaston levé al ver la port sorti)

Aline
La mo krwar mo bizin don bolom en bon kudmé, sinon li pu enkor fatig so
latet ar sa.
Kan mo pansé ki kantité problem la drog fin kozé !
Ki kantité sufrans droger la ek so famye gagn
Ki kantité mizer sosieté pasé ar vol, violans et frayer
Ki kantité maladi sida ek otr pé ogmanté
Ki kalité lavi nu pé amené kan nu tu per pu sorti lor simé…pa zis dan nwar.
Et ki nu pe fer pu aret sa ……naryen !!
Mo bizin ankuraz bolom fer kitsoz…..

Rido

Akt 1, sen 3

Landrwa - Dan Bar
Barman dan so plas
Kup zenes tuzur la - Gaston rantré

Barman
Alo Ton Gas, ki bon divan fin amen u sa ler la, sa en mari kudvan sa !!

Gaston
MBC pa pe zué futbal, mon vin get li lor gran lekran.

Barman
Ici osi dan pins, pe zoué li lor kanal evenma, et sa nu napena.

Gaston
Avek to kas si to dan bez - MBC ti abitié done, zot fin truv pu aret sa -
prefer mo return la kaz, al amerd bolfam inpé

Zenes
Hé, ton, par ici, ris en sez…..Barman don ton la en labier, met lor mo kont.

Gaston
Merci, kuma zot enkor la!!

Zenes
Péna rol zordi

Gaston
Mo kamuad la kot li?

Zenes
Nu ti kontign diskition la letan un ale…. Mari top….me nu tu le de pa kompran solition la…. Mo ti pé esperé u returné pu truv lizur ar sa.

Barman
Ton Gas, mwa osi mo ti pé ekut dialog la… li top top.. Dapré sa ki mo kompran, solision la mari simp on diré…

Gaston
solision li simp pu kozé mé li danzeré pu kozé…. Mo fam mem dir mwa pa
tro kozé… capav truv la mor la dan.

Zenes
Kumsa ton, la mari nisa sa…pa per ou… si bizin don kudmé nu la..

Barman
Ton Gas kozé ou, si bizin met lord paper u. sa problem ladrog la bizin resudsa. Mo mama mem in al dan en home acoz li per pu viv tusel. 2 fwa voler in rant kot li kokin sa 2,3 zafer ki li éna la. La polis mem ine dire droger sa.

Gaston
La zot pé fors mo lame.. Mo fin promet Aline mo pa pu koz lor la ankor mé
zot paret dimum korek.

Zenes
Mam u pa pu gagn traka ar nu, okontrer!!

Gaston
Kuma mo dire solision la li simp me nu bizin sipor dimun onet, ki envi fer
kitsoz. Fode premier minis anvi. Mo sir si li rési aplik lidé la li kapav ene
premiere dan le mond et mem gagne pri nobel pu sa.

Zenes
Kozé..rakonté.. Sa pli nisa ki ti feye sa..

Gaston
Fer kumanyer guvernma prodir la drog dans moris - tu kalité to anvi..

Zenes
Ki ulé dir van dan lafarmasi??

Gaston
Non, ekut mwa bien. Si guvernma fer li, kalité pu bon, non?

Zenes
wé, li pu mari seryé..kalité bizin top, omoin pa pu ena la mor avek fay dop!

Barman
Ton Gas , la upé fané, la. Guvernma pa gagn drwa fer sa. Sa pu enkuraz
dimun pran ladrog. La upu truv dimun pé nazé lor koltar. Sa pu anpir lé soz. Sa mem gran lidé la sa… Ton Permal ti ena rezon.. Sa li lidé en fu.
(Barman al ver so bar, desu)

Gaston
Pa pas zizma tro vit ..twa to disan tro so. Révin isi mo pu eksplik twa.
(Barman returné)
Dabor les mo dir twa benefis prozé la. Pa pu éna marsan la mor, ki so gran baron u ti kuyon lor simé pé vendé - sa pu disparet completma

Zenes
La ton, ou pe enter nu net. Bé ki pu arive nu provizion?

Gaston
Apran ekuté - pa pu éna marsan, sa pa ulé dir pa pu ena ladrog. Kan pena marsan, pa bizin ale rod zot dan erpor, dan danboi tusa. Pa bizin Ladsu, ssu et ban lapolis spesyal. Pa pu ena lapolis, politisien ki mars ar baron
paski baron la mem pa pu ena. Droger pa bizin kokin u toye dimun pu zot gagn zot fix. Nu pu koné komie droger ena et ki marsandiz zot pran, san problem. Kan nu kon droger la nu pu kapav ed li pli bien si li anvi

Zenes
Mé la u pé dire ene ban zafer san dir nu narien. La u pé koz kumadir u mem in gagn u fix.

Gaston
Zenes zordi pena patyans. Pens en ku, to gagn to ladrog ki to anvi ,kan to lé et komie fwa to anvi. Bon pa bon

Zenes
Sa mari nisa sa, mé pa fié lor Bik Man la pu fer sa, ha ha!!

Barman
Wé viv dan rev mem..

Gaston
Pa tracas twa, si Bik Man la kuna to dir anvi fer li, li kapav, ki anpes li? Raplé bien li pu en prozé inik o mond. Sa pu servi lexamp pu tu payi ki so gran, ki so tipti. Sa li pa zis en solityon pu ladrog li osi pu sida. Sa ki ran lidé la important

Barman
Ou anvi revolition dan pay akoz en de droger? Politisien pa pu manz bul - enku zot pu perdi elektion. Mo pa truv oken parti pu fer sa, et modon zot rezon.

Gaston
Et si mo dir twa ena politisyen ki pu interesé

Barman
Wé mo kwrar mo koné kisanla

Gaston
Ekut mwa bien. Pli bon but pu vini. Prozé la pu krée anplwa - Lizin ki fer panadol li pu osi prodir la drog

Barman
Lerla dimun pu pran ladrog olie ki panadol

Gaston
(avek en surir)Mo apé atan sa komenter la de twa. Sa pu krée anplwa, me pa sa ki inportan la. Se tut en sangema pu le meyer ki nu pu truvé dan sosieté. Nu pu ne pli per pu mars lor simé, nu pu nepli per mem dan nu lakaz.

Zenes
Kozé burzwa, pa gard naryen. Dir nu ki bizin fer pu gagn nu doz.

Gaston
Jessen, to pa fimé twa, wi?

Jessen
Non, et mo péna lintention osi.

Gaston
Et si mo dire twa fimé, mo pu don twa en pake 20 tu le zur, to pu kumens
fimé?

Jessen
Pena simé - mo koné ki bez ena ar sa - mem si u don mwa whiski osi mo pu refisé, mem si li gratis.

Gaston
Ki fer?

Jessen
La u pé koz nimport la. Non mo fin asé truv dimun fané ar lalkol pu mo tus li

Gaston
Si mo dir en zenes 18 an ki pa fimé, mo dir li mem zaffer, eski li pu fime mo sigaret gratis et bwar mo whiski tu le zur?

Zenes
Me non, sé ki pa fimé, li pa pu tusé, saki pa bwar, parey - forsé en de kuma
mwa pu fer li. Me sa ban la gratis pa gratis zot ti pu fimé ou bwar. Pa akoz
u ena kas ki u bwar, fimé. Pu sertin li parey kumadir u pe dir en mizilma u pé don li lavian pork gratis u en indien, bef gratis. Sa ki pa pu tusé la li pa pu pren, mem si li miser

Gaston
Zoli kozé, pu en ku to fin servi to laservel. En dot mo to ulé dir ki pa mank dargen ki anpes dimun pran en vis. Saki pu tom dan vis la li ena cas, li napena, li pu tuzur tomb dan vis la. Komié milyoner ena ki pa bwar, fimé, u drogé - Ki fer ?

Jessen
Zot laré, akoz samem zot milyoner.

Gaston
Jessen, si mo dir twa mo don twa ladrog ki to anvi, kantité fwa to lé, ki to dir.

Jessen
Mo telefon mental mo dir vin pran u. Kategorik non!!!

Gaston
Twa zenes, si mo don twa la drog ki to anvi, ki to dir?

Zenes
Gratis? Et pu tuletan. La mo pe sirfé la (gran surir)

Gaston
Sa ki pu sirfé la, gratis pa gratis li pu sirfé mem li, mé kan li ena pu payé li
fer nu swinté!

Jessen
Si u diman mwa, mo dir upé sutir vis sa ban la(pwint ver ban zenes)
Akot aster la ena zis 2 dan mo restoran, avek u remed ton Gas, mo truvé
entimama tu dimun pu sirfé kuma li pe dir (fer zes pe pran lezer)

Zenes
Et ladsu pa pu met dir lor nu lapo?

Gaston
Pa pu ena ni ladsu ni tisu, grosu To lib pu vin pran to fix kan to anvi.
Wé mo ti pé dir, eski sa pu fer twa konsom plis si mo don twa li gratis?

Zenes
Be normal, Ton. La pu mem depas brizan tusala - la u pé fer mwa deja sirfé la.

Gaston
Ban kuyon kuma twa la normal pu sirfé….. Alor to lavi nek fer pu sirfé mem? U ti mamzel, ziska ler u pa fin dir en mot, be ki u pansé?

Mamzel
Hmmm…..me u koné, ena lezot zafer si nu ti kontan fer,,,,amen en lavi kuma tu dimum…nu himin nu..nu osi anvi marié, ena en lakaz, parey kuma tudimun.

Gaston
Alor ena lespwar kan mo ekut sa mamzel la, omwin li anvi amen en lavi normal. Pu sa osi pu ena provision. Hin Jessen…pas tu droger ki pu nek sirfé, gramatin ziska aswar….

Jessen
La Ton Gas, u fin perdi mwa la, en ku u don zot ladrog gratis, en ku u dir
ena lespwar…..boner u ti pe koz ipokrit…abesa kuma u apel sa.

(Permal rantrer avec so madam ek Aline)

Permal
Mo pe swaf….Jessen, ene turné zeneral..

Jessen
(koz ar li mem)
Wé zordi mo fin tan tu…Ton Gas don sigaret, lalcol et mem la drog gratis
et Ton Permal fer en turné zeneral…sa li en prémiere

Gaston
Aline ..mé..ki apé arrivé.

Permal
To fam pe trakasé..li dir mwa li fin dir twa al dan bar apré li pé per akoz li
koné to pu vin rakont zistwar….Li dir mwa to lavi an dangé… Ki sa zistwar
la sa? Fer moi kit mo futbal.

Gaston
Mé Alin o, Kuma to truvé tu dan lord, nu pé pas en bon moman. Mem
Jessen zordi li éna dialog.

Aline
Apré ki mo fin dir twa al dan bar, mo fin gagn traca, akoz mo kon to
manyer..to pu bizin kozé..to pa pu pens konsekans - mo pa envi vin vev, mwa.

Permal
Alé rakont inpé, ki pé fer Aline per kumsa

Gaston
Wé, to fin rat sa ki mo pé dir banla, alor mo ava fer ene rezimé…

Jessen
(amen ban koman)
We, Ton Gas in fu, li pé envi don ladrog gratis, et li dir sa pu solvé tu problem.

Permal
Mo koné lin vin fu, mé pu vin avek sa solisyon la…la lin depas tu limit.

Gaston
Kuma mo pé dir mo don twa en rezimé… Ala li la. Moris pu fer ene action pilot avek siport tu ban gran pay. Lidé sé nu met li en pratik a moris en premier et ler la lezot payi kapav swiv lexamp. Moris pu pran tu ladrog ki sezi dan le mond et li pu rafin li a moris.

Jessen
Wé, pu aret gagn panadol, aster pu gagn la drog olié

Gaston
La drog pu distribué gratis, kumsa dimun pa bizin al kokin pu nuri zot vis et en mem tan met baron la drog en retret.

Permal
To koné ki to pe kozé mem twa?? La to pu truv tu dimun lor la drog. Ki so
fam, zanfan, Et to krwar ban baron la pu ale trankil. Zot pu al kokin tu
stok, zot pa mem bizin inporté - to pe ran zot latas fasil. La nu pu truv droger apé stok ladrog gratis dan zot lakaz, pu letan dir.

Gaston
Mo sir tu dimun pu rezon kuma twa kan zot pu tan sa lidé la. Mé li pa pu pas kumsa. Dabor buku refleksyon in fer.. Sa li pu en arangma avek plizier payi. Guvernma ki pu pran les soz an mé. Li pu byen organizé. Tu prekosyon pu pran pu fer plan la reusi.

Jessen
We fonktyoner ki pu okip sa..la mem nu koné kuma fonktyoner travay -
manze dan ler travay, triye bred dan ler brek.

Gaston
Bon ala kuma li pu fer. Pu ena en komité avek zis 2,3 eksper , Exper lor tretma droger - li, li pu ena so lekip Exper sekirité - pu fer en manier tu pas dan lord et sekirité stok . Exper fabrication - pu fer en manier gagn prodwi kalité. Exper distribition - pu truv meyer fason distribyer san enkuragé
Et premier minis kom tierman

Jessen
Abe la pu dan bez, reinyon zamé pu fer

Gaston
Si bizin en de exper ankor. Tu sa exper la pu morisyen, exsepté ene depi
natyon zini u kisoz kom sa, pu liaz avek les ot parti prenant internatyonal.
Asterla, banla ava zer la sitiatyon kuma bizin.

Permal
Abé twa ki to role ladan - to tusel kon sa prozé la, aster kan pli bon but
arivé, to larg sa dan lamé ban eksper? Sirtu twa ki abitié kritik banla?
Selma mo kon twa, pli sir to pu al montré eksper la fer so travay.

Aline
Wi mé si zot servi lidé mo Gaston, alor zot bizin li pu explik sa ban la bien,
sinon zot kapav turn en bon lidé anbalao.

Gaston
Mwa mo pa bizin loner tusala, komité gard sa pu eksper, kan zot bizin mwa
zot koné kot pu truv mwa. Zot koné mo bizin pans nu sekirité!

Permal
He Gaston, aster mo pe pran twa kont. Sa lidé la li pa nuvo - depi lontan
buku payi pe koz fer ladrog vin legal mé ziska ler li en ta kozé san debus
nilpar. Aster twa to pe vin avek kitsoz kumsa. Monwar, mo kwar to lidela
pu tas lor poto sa.

Gaston
Get sa Permal, sa ladrog ki pe don droger dan sant detox la, si to al lafarmasi eski to pu kapav asté li? Sa ranplasan la mem en la drog ki si maye sa lo twa, to al fermé, purtant guvernma pe don sa gratis, avek benediksyon nutus.

Permal
Wi mé sa li bien kontrolé, et dimun ki bizin ki gagn li, pa nek nimport kisana vini, piké alé. Apré to pa kapav konpar tretma avek propaz ladrog.

Gaston
Mo lidé la osi pu parey, li pu bien kontrolé et plitar kan to pu reflesi lor la to pu truvé ki kantité kontrol pu ena. Et to pe koz tretma, si mo dir twa ki sa ki pe propozé la se en tretma droger dan le lon term.

Jessen
Wé ton la don u la drog et li dir li pe tret u. Sa le mond la in futi.

Permal
Jessen pu en ku ena rezon. Kuma to kapav dir de sotiz parey…

Gaston
Asterla to pa kone komie droger ena, alor kuma to kapav dir to pu tret zot.
He avek ki to pe tret zot…..avek en lot ladrog. Sa ki to pe fer, se fer en
droger vin en lot kalite droger. Tandi ki mwa mo pe pens en lot kalite tretma ki fer dimun aret depan lor oken ladrog.

Jessen
Ton Permal, ou ape gaspye u lesuf ar Ton Gas.

Zenes
Hé Ton, 'supply' la kot pu gardé?

Gaston
To koné, kitsoz pa fer brik brak sa. Ena tuten kanpay information pu fer pu
piblik ainsi ki pu ban droger. Dabor kan droger kompran sistem la bien, pu dir li vin anregistré dan ban sant spesyal. Li pu gagn ene kart electronik ek so foto lor la. Lor kart la pu ena tu so linformatyon pareil kuma kart identité. Anplis pu mete ki preferens la drog li ena et komié li pran…et bien sir komié fwa li pran li. La rezon se pu kapav kontrol stok

Zenes
Hé sa zistwar anregistré la pa kool ditu…

Gaston
Sa li ekstrema inportan. Paski sak doz to gagné sa pu enregistré lor komputer.

Zenes
Sa li paret en latrap, kan Bik Man kon nu ek nu ladres, li pas filet lial ferm nu….

Jessen
We, dan lazil ansam ar Ton Gas

Aline
Jessen inpé respé pu pli gran ki twa….

Jessen
Si u dir

Gaston
Kot mo ti arivé….Wé, kan fabrikatyon pé tap so plin, anrezistrema in fer, in
koné ki kalité et ki kantité bizin dan sak rezyon, ene sant in amenazé avec so ekipma ek so personel, sekirité enplas, lerla fer uvertir et distribityon kumansé.

Zenes
Si sa marsé, kool, mo al pran mo stok ene mwa, mo al lacaz?

Gaston
Ki to krwar, pansyon sa? Non mo garson, avek sa prozé la sant la pu uver pandan 16 zertan. To alé, ban la pas to kart lor komputer, pik twa avek sa ki to anvi, u to uver labus et don twa to komprimé, to alé. Kan to bizin lot doz to returné.

Zenes
Abé ti fey ki arive, fim laba mem? Sa bizin fim an grup, ena pli nisa.

Gaston
Sa bizin pans lor la, si mo tiena tu repons, pa ti pu bizin eksper, mo mem ti ava tusel lor komité. Bizin pofin lidé la inpé plis.

Zenes
Sa vé dir osi ki mo kapav ale dis ku et mo pu gagné sak fwa?

Gaston
Ki to krwar panadol sa to kapav depas doz. Kuma to nariv limit, komputer
pu met en gro ridiek. Nu pa la pu tuy dimun.

Aline
Kuma zot truvé, mo Gaston fin bien reflesi lor la, li pa sa lidé fu la.

Permal
Wi, mo fin bien ekut twa, Gaston…. Mo truveé ki li pa sa mal la, et lesoz paret bien organizé….Mé…mo pa koné, ena kitsoz ki pé klosé kit par.

Jessen
Sa lidé la ranpli ar klos…sa pé badin ar difé sa.

Permal
Lesens lide la bon

Jessen
sanlala li apé azut lesens li.

Gaston
To koné Permal ene lidé kumsa li pu sok dimun…ena pu truv li ene gran lidé.. ena pu truv li degutan. Zamé pu gagn tu dimun dan tu payi pu aksepté ene lidé. Mem si dimé mo invant en glob ki zamé brilé, dimun pu truv kitsoz pa bon ar sa - get ki ti ariv prozé larut ferney!

Permal
Mo fin gagn lokazion reflesi en tipé. Dapré twa, ban baron ladrog pu asizé
le bra krwazé?

Gaston
Sa li mo freyer osi. Zot pu rod detrir stok guvernma pu zot kapav van pu zot. Sant la bizin buku protektyon.

Permal
Kapav plas li dan la kur statyon la police et met SMF vey li.

Mamzel
Sa prozé la, li pu tu le tan sa, omié kuma Kumar pé dir, apré en lepok, kan nu tu fin anrezistré, zot aret prozé la et lerla nu fin perdi partu.

Gaston
Non sa li pu diré pandan bien longtan, et plizir lezot payi pu kopiy nu et nu
kapav truv sa repliké partu dan le mond. Mé raplé byen, pe fer sa pu en bon rezon. Kan droger in sorti dan plakar, li pli fasil pu aid li et travay ansam pu li truv so gerizon. Pu ena sikolog, lezot terapi ki droger la pu ankurazé pu swiv. Kan ufer kitsoz uvertema, pli sir pu ena koperation.

Mamzel
Sa li vre sa…komié fwa mo fin dir Kumar pu swiv tretma, et li dirmwa si
nu al dan sant, kapav gagn problem ar sa, sirtu lapolis kapav vey u.
Avek u prozet lapolis pa bizin vey u paski u deza lor komputer et pa pu
servi u pu tras ban marsan.

Permal
Abela on diré pa bizin ONG koté ladrog ditu.

Gaston
Mé non, banla tuzur kapav partage zot kompetans sirtu kot don konsey ek
siport, mé pa koté don la drog.

Permal
Boner to ti pe koz sida…

Gaston
Sa so bon koté…Pena partaz sering, alor sida kapav kontrolé inpé. Lorla pu
fer test depistaz de tan en tan pu kapav identifyer sida boner.

Permal
Ki lasirans to ena ki kantité droger pa pu ogmanté, et mem ban ki pé deza
drogé pa pu ogmant zot doz akoz li gratis.

Gaston
Kuma nu ti dir boher, pandan plis ki milan, droger pe ogmanté. Mé aster to pu kapav pli kontrol li et sirtu koté terapi, ena pli sans dimun pu partisipé.

Aline
To truvé Permal, mo Gaston li ena bon lidé, mé aster li bizin en kudmé pu
konvink guvernma pu particip ladan.

Permal
Fasil dirsa, Aline, mé to kon inpé guvernma kuma eté. Zot bizin gagn kitsoz
ladan. Mo raplé en lepok ti ena mem depité ti transporter ladrog. Sa fodé zot gagn en mari but pu zot kapav konsider lidé la.

Aline
Mé nu napena but ki nu kapav doné. Nu pé don lidé, aster zot kapav mem al van sa ar lamerik pu don en kudmé ladan.

Jessen
Get sa misié, madam…mo fin bien pran patians…me tu patians ena limit.
Mo nepli anvi tan sa mo ladrog la u sidala…..avek tu le respet mo anvi zot lev zot paké alé…alé pa return ankor.

Rido
Kestion de lodians

posted by Ton Duc @ 10:32 AM